عمران خان کو بنی گالہ منتقلی کی پیشکش نہیں کی‘ رہائی کیلئے کوئی دباؤ نہیں، خواجہ آصف
وزیردفاع خواجہ آصف کا کہنا ہے کہ پاکستان تحریک انصاف کے بانی چیئرمین عمران خان کی رہائی کیلئے کوئی دباؤ نہیں ہے، حکومت کی جانب سے جیل سے بنی گالہ یا کہیں اور منتقل کرنے کی کوئی پیشکش بھی نہیں کی گئی۔ سیالکوٹ میں تقریب سے خطاب کرتے ہوئے انہوں نے کہا کہ یالکوٹ میں جو پیداوار ہوتی ہے وہ ایکسپورٹ کی جاتی ہے، اس شہر کو بانڈڈ سٹی قرار دیا جانا چاہیے، یہاں بزنس کمیونٹی نے ایئرپورٹ بنایا، شہباز شریف نے بطور وزیراعلیٰ اور نواز شریف نے بطور وزیراعظم سیالکوٹ کے لیے قابل فخر کردار ادا کیا۔ بانی چیئرمین پی ٹی آئی سے متعلق بات کرتے ہوئے وزیر دفاع نے کہا کہ عمران خان کو ہاؤس اریسٹ کرنے یا کہیں اور منتقل کرنے کے حوالے سے دعوے پی ٹی آئی والے خود ہی کرتے ہیں، اس حوالے سے پی ٹی آئی کے دعوے میں کوئی صداقت نہیں، عمران خان کی رہائی عدالتوں کے فیصلوں پر منحصر ہے، میں عدلیہ سے تعلق رکھتا ہوں اور نہ ہی جوتشی ہوں کہ کوئی پیشگوئی کرسکوں، تاہم حکومت کی کوشش ہے کسی طرح سیاسی استحکام لایا جائے۔ خواجہ آصف کا کہنا ہے کہ پی ٹی آئی کا ملک کو نقصان پہنچانے کا ہر حربہ ناکام ہوا، اس وقت معاشی اعشاریے آج بہتر ہوتے جا رہے ہیں، بیرون ملک موجود پاکستانیوں کی دعائیں رنگ لے آئیں اور یورپ کے لیے پروازیں بحال ہوئی ہیں، فلائٹس کی تعداد بتدریج بڑھائی جائے گی، برطانیہ کے لیے بھی جلد پروازیں چلائی جائیں گی، نارتھ امریکہ تک یہ سلسلہ شروع کریں گے، 19 یورپی شہروں تک فلائٹس آپریٹ کی جائیں گی۔
